Başa vurmaqda olduğumuz 2013-ci il Azərbaycanda demokratiya və insan haqları sahələrində ciddi islahatların aparıldığı il kimi tarixə düşə bilərdi. Amma ölkəmiz bu sınaqdan üzüaçıq çıxa bilmədi. Və 2013-cü il daha çox yaddaşlarımızda repressiyalar inkişaf dövrü kimi  qaldı.  Müsavat Partiyasının üzvü, tanınmış siyasi fəal Fuad Bağırzadə hesab edir ki, ilin əvvəllərində pozitiv, nikbin fikirlərə rast gəlinsə də, hakimiyyətin mahiyyətinə bələd olanlar dəyişikliklərin pisə doğru olacağını təxmin etmişdilər. Təəssüf ki, bu gözləntilər özünü doğrultdu.

“ Keçirilən president seçkilərindən sonra ölkədə demokratiyanın vəziyyətinin yaxşılaşacağı güman edilirdi. Təəssüf ki, 2013-cü ilin ilk aylarında 10-dan çox siyasi fəal həbsə atıldı. NİDA-çı gənclər ölkədə iğtişaşlara səsləməkdə, qanunsuz silah saxlamaqda ittiham olundu. İsmayıllı etirazlarına görə saxlananların məhkəməsi hazırda davam edir. Həmin hadisələrə görə saxlanan REAL Vətəndaş Hərəkatının sədri İlqar Məmmədov, Müsavat partiyası başqanının müavini Tofiq Yaqublunun həbsi beynəlxalq ictimaiyyətin, hüquq-müdafiə qurumlarının qınağına tuş gəldi.  Dekabrın 16-da seçkilərin Monitorinqi və Tədrisi Mərkəzinin sədri Anar Məmmədlinin həbsi yerli və beynəlxalq hüquq-müdafiə qurumları tərəfindən pisləndi. O, vergidən yayınma, qanunsuz sahibkarlıq fəaliyyəti və seçkinin nəticələrini saxtalaşdırmaqda ittiham olunsa da, bu həbs Məmmədlinin ictimai fəaliyyəti ilə əlaqələndirildi. «Amnesty International» təşkilatı Anar Məmmədlini «vicdan məhbusu» elan etdi.

 
Dekabrın 17-də parlament «QHT-lər» və «Hüquqi şəxslərin dövlət qeydiyyatı və dövlət reyestri haqqında» qanunlara  dəyişiklikləri qəbul edib imzalanması üçün prezidentə göndərdi. Bu dəyişikliklər ölkədə ifadə və birləşmə azadlığının daha da məhdudlaşdırılması kimi dəyərləndirilir. Belə ki, Ədliyyə Nazirliyinin QHT-yə verdiyi qeydiyyat sertifikatına 90 günlük limit qoyulur, məhkəmələrə yerli və xarici QHT-lərin fəaliyyətini bir illiyə qadağan etmək hüququ verir, qeydiyyat sənədlərinə tələb olunan dəyişiklikləri etməyənlərə cərimələr tətbiq olunur və s.”

Musavat fəalı xatırlatdı ki, bu ilin martında QHT-lər haqqında qanuna edilən dəyişikliklər donorlarla rəsmi qrant müqaviləsi imzalamayan QHT-lər üçün əlavə inzibati tələblər qoydu və qeydiyyatsız QHT-lərin maliyyə əldə etməsini də məhdudlaşdırdı: “2013-cü ildə diffamasiyaya görə cəzanın İnternetə aid edilməsi isə ifadə azadlığının məhdudlaşdırılması kimi qiymətləndirildi. Bundan sonra bir bank işçisi internetdə həmin bankı tənqid etdiyinə görə məhkəməyə verildi, jurnalist Natiq Adilova «facebook» fəaliyyətinə görə xəbərdarlıq olundu.

2013-cü il daha bir neçə jurnalistə həbs cəzası kəsilməsiylə də yadda qaldı. «Tolişi-Sədo» qəzetinin baş redaktoru Hilal Məmmədov 5 il azadlıqdan məhrum edildi, daha bir jurnalist Pərviz Həşimli MTN-nin istintaq təcridxanasında saxlanır.

Azadxəbər.org saytının baş redaktoru Nicat Əliyevə 10 il cəza verilib. Hüquq müdafiəçiləri hazırda ölkədə 143 siyasi məhbusun olduğunu deyirlər.

Avropa Şurasının insan haqları üzrə komissarıNils Muižnieks bir müddət əvvəl bildirib ki,

özəlliklə söz və sərbəst toplaşma azadlıqları sahəsində repressiv tədbirlərin çoxaldığını gördük. İrəliyə doğru kiçik bir addım da vardı – yürüş keçirilə biləcək yerlərin siyahısı açıqlanmışdı. Mən bundan artığını – ölkədə sərbəst toplaşma azadlığının tam təmin olunmasını görmək istərdim».

Komissar hakimiyyəti diffamasiyaya görə cəzanı ləğv etməyə, Bakının mərkəzində vaxtaşırı etirazlara icazə verməyə, inandırıcı görünməyən ittihamlarla həbsdə yatan məhbusları, bloqqerləri, müxalifətçiləri azadlığa buraxmağa çağırırdı:

«Bunların elə indi baş verməsini görmək istərdim. İrəliyə konkret addımlar atmaq lazımdır. Ancaq bu halda Azərbaycanın sədrliyi uğurlu ola bilər. Əks halda o, sədrlik dövründə pis siyasəti və qanunları müdafiə etmiş görünəcək ki, bu da yaxşı hal deyil».

Fuad Bağırzadə onu da bildirdi ki, 2014-cü ildə ciddi siyasi islahatların aparılması üçün xalq fəal olmalıdır: “Hökumətə qarşı təzyiqlərimizi artırmalıyıq. Xüsusilə də, mən gəncləri mübarizəyə səsləyirəm. Şəxsən mən gənclərin hökumətə qarşı aparacaqları mübarizəyə liderlik etməyə hazıram və bunu qorxmadan qeyd edirəm”.