Avqustun 28-də axşam saatlarında parlament nümayəndə heyətinin sədri olaraq Azərbaycana iki günlük rəsmi səfərə gələn Türkiyə Böyük Millət Məclisinin sədri Binali Yıldırım çərşənbə axşamı Azərbaycan rəhbərliyi ilə bir sıra görüşlər keçirib.
İlk rəsmi görüş prezident İlham Əliyevlə danışıqlarla başlayıb, daha sonra Azərbaycan parlamentində görüşlər keçirilib və daha sonra hökumətdə baş nazir Novruz Məmmədovla danışıqlar aparılıb.
Görüşlərdə ikitərəfli, regional və beynəlxalq münasibətlər məsələlərinə toxunulub.
Azərbaycanın rəsmi mənbələrinin məlumatına görə, prezident Əliyev Bakı-Tbilisi-Ceyhan neft boru kəməri, TANAP qaz kəməri, Bakı-Tbilisi-Qars dəmir yolu kimi birgə qlobal kommunikasiya layihələrinin əhəmiyyətini qeyd edib. O, həmçinin Binali Yıldırımın hələ baş nazir vəzifəsində olarkən regional layihələrə verdiyi töhfəni vurğulayıb.
Yıldırım prezident Erdoğanın salamını çatdıraraq, ikitərəfli münasibətlərin daha da dərinləşəcəyindən əminliyini bildirib.
Parlament və hökumətdə görüşlərdə də iki ölkə arasında yüksək səviyyəli münasibətlərdən danışılıb. Baş nazir Novruz Məmmədov bununla əlaqədar prezident Heydər Əliyevin “Bir millət, iki dövlət” deyimini xatırladıb.
Öz növbəsində, Yıldırım Kamal Atatürkün “Azərbaycanın sevinci bizim də sevincimiz, kədəri bizim də kədərimizdir” sözlərini yada salıb.
Bu iki bəyanat iki ölkənin beynəlxalq səviyyədə müxtəlif sahələrdə qarşılıqlı əlaqələrinin tarixini və regional və qlobal siyasətin bir çox məsələlərində mövqelərin üst-üstə düşdüyünü göstərir.
Danışıqlar təfsilatı haqqında az məlumat verilir.
Türkiyə nümayəndə heyəti bu gün səfərini tamamlayır və vətənə qayıdır.
Buna qədər Binəli Yıldırım Azərbaycana baş nazir qismində üç dəfə səfər edib. 2016-cı ilin iyununda və 2018-ci ilin martında o, Bakıya səfər edib, 2017-ci ilin dekabrında isə Banqladeşdən qayıdarkən yolüstü qısa müddətlik Naxçıvanda dayanıb.
Azərbaycan rəsmi statistikasının məlumatına görə, 2017-ci ildə iki ölkə arasında ticarət dövriyyəsi 2,6 mlrd. dollara çatıb.
Son vaxtlar dövlət səviyyəsində ikitərəfli fəallıq artan istiqamətdə irəliləyir və Azərbaycanın ilk müstəqillik illəri ilə müqayisə olunacaq səviyyədədir.
