Milli Məclisin təbii ehtiyatlar, energetika və ekologiya, iqtisadi siyasət, sənaye və sahibkarlıq, hüquq siyasəti və dövlət quruculuğu komitələri fevralın 22-də “Ələt azad iqtisadi zonası haqqında” qanun layihəsini ikinci oxunuşda bəyənib.
Bu haqda parlamentin mətbuat xidməti xəbər verir.
Məlumata görə, parlament komitələrinin birgə toplantısında birinci oxunuşdan sonra qanun layihəsinə edilmiş əlavə və dəyişikliklər müzakirə olunub.
Milli Məclis sədrinin müavini Valeh Ələsgərov dəyişikliklər haqda bilgi verib. Onun sözlərinə görə, dəyişikliklər azad zona səlahiyyətli qurumunun hüquq və vəzifələri, idarə edilməsi, azad zonada gömrük işi, sərhəd rejimi, əmək qaydaları və mübahisələrin həlli qurumlarının qərarlarının icrası ilə bağlı olub. Azad zonada işçi dillər də dəqiqləşdirilib. Azərbaycan və ingilis dilləri, eləcə də zərurət yarandıqda başqa dillər həmin zonaların işçi dili olacaq.
Deputatlar qanun layihəsini ikinci oxunuşda bəyənərək, Milli Məclisin müzakirəsinə göndəriblər.
Ələtdə azad iqtisadi zonasının yaradılması prezident İlham Əliyevin 2016-cı ilin martında imzaladığı sərəncamda nəzərdə tutulurdu. Həmin sərəncam “Ələtdə Yeni Bakı Beynəlxalq Dəniz Ticarət Limanının ərazisi daxil olmaqla azad ticarət zonası tipli xüsusi iqtisadi zonanın yaradılması ilə bağlı tədbirlər planı haqqında” adlanır.
İlham Əliyev ötən ilin mayında yenidən bu məsələyə qayıdıb, azad iqtisadi zonaların yaradılması işinin sürətləndirilməsi haqda sərəncam imzalamışdı.
Fərmana əsasən, azad iqtisadi zonaların yaradılmasının sürətləndirilməsi məqsədilə İşçi qrup yaradılıb və Milli Məclisin sədr müavini Valeh Ələsgərov onun sədri təyin edilmişdi.
Azad zona ölkə ərazisinin xüsusi rejim altında fəaliyyət göstərən bir hissəsidir. Belə zonalarda istehsal olunan məhsullara milli gömrük ərazisindən kənarda olan obyekt kimi baxılır. Həmin məhsullar gömrük nəzarətindən keçirilmir, vergiyə cəlb edilmir.
