Qadın Problemlərinin Tədqiqatları Mərkəzi Azərbaycan Respublikasının Prezidenti Yanında Qeyri-Hökumət Təşklatlarına Dövlət Dəstəyi Şurasının dəstəyi ilə “Regionlarda “Açıq hökumət” təşəbbüsü ilə bağlı məlumatlandırma” layihəsi çərçivəsində növbəti tədbirini keçirib. Qusar şəhərində 32 nəfərin iştirakı ilə keçirilən tədbir iki saatdan artıq davam edib.
Tədbiri giriş sözü ilə açan Qusar Rayon İcra Hakimiyyətinin nümayəndəsi Kəmalə Qılıcova Açıq Hökumətin Tərəfdaşlığı Təşəbbüsünün (AHT) əhəmiyyəti ilə bağlı məlumat verib.
Daha sonra çıxış edən Azərbaycan Respublikasının Prezidenti Yanında Qeyri-Hökumət Təşklatlarına Dövlət Dəstəyi Şurası katibliyinin əməkdaşı Həsən Səmədov da “Açıq hökumət” təşəbbüsü ilə bağlı əhalinin maarifləndirilməsinin əhəmiyyətini vurğuladı. Katiblik əməkdaşının sözlərinə görə, layihənin ictimai əhəmiyyəti nəzərə alınaraq Şura tərəfindən maliyyələşdirilir.
Daha sonra çıxış edən Qadın Problemlərinin Tədqiqatları Mərkəzinin sədri Sevil Allahverdiyeva layihə haqqında iştirakçılara məlumat verib.
Layihənin əsas məqsədi məlumatlandırma yolu ilə Azərbaycanda Açıq Hökumət Təşəbbüsünün tətbiqinə töhfə verməkkdən ibarət olduğunu bildirən S.Allahverdiyeva tədbir çərçivəsində verilən məlumatların iştirakçılar üçün faydalı olacağına ümid etdiyini bildirib.
Daha çıxış edən Açıq Hökumətin Təşviqinə dair Hökumət-Vətəndaş Cəmiyyəti Dialoqu Platformasının üzvü Xalid Kazımov iştirakçılara Açıq Hökumət Tərəfdaşlığı Təşəbbüsü ilə bağlı məlumat verib.
Açıq Hökumət Tərəfdaşlığı Təşəbbüsü yaradılması ideyasından danışan X.Kazımov bildirib ki, təşəbbüs 2011-ci ildə Vaşinqtonda 8 ölkə təmsilçiləri və bir sıra beynəlxalq QHT-ləri tərəfindən isrəli sürülüb: “Azərbaycan da təşəbbüsə qoşulan ilk ölkələrdən biridir. Hazırda 75-dən artıq ölkə təşəbbüsü dəstəkləyir. Bir sıra subyektiv səbəblərlə bağlı 2016-cı il mayın 4-də Açıq Hökumət Təşəbbüsü Rəhbər Komitəsi tərəfindən Azərbycanın statusunun müvəqqəti dondurulması barədə qərar qəbul olunsa da, ölkəmiz açıq hökumətin prinsiplərinə sadiq olacağını elan edib. Bu günlərdə Açıq Hökumətin Təşviqinə dair Hökumət-Vətəndaş Cəmiyyəti Dialoqu Platformasının Beynəlxalq Açıq Hökumət Tərəfdaşlığı Təşkilatının Azərbaycana səfərə gələn nümayəndə heyəti ilə görüşü keçirildi. Beynəlxalq ekspertlər də vurğuladılar ki, son bir ildə Azərbaycan hökuməti tövsiyyələrin icrası ilə bağlı əhəmiyyətli addımlar atıb. Onların qənaətinə görə, hökumət-vətəndaş cəmiyyəti dialoqu çox mühümdür və Azərbaycanda da bu istiqamətdə daha çox iş görülməsini istəyirlər. Azərbaycanla bağlı qərar bu ay veriləcək və ümid edirik ki, bu qərar müsbət olacaq”.
X.Kazımov bildirib ki, hazırda Azərbaycan Açıq Hökumət Tərəfdaşlığının tətbiqi istiqamətində fəaliyyətini davam etdirir: “Azərbaycan Prezidentinin 2421 saylı, 5 sentyabr 2012-ci il tarixli fərmanı ilə “2012-2015-ci illərdə Açıq Hökumətin Təşviqi üzrə Milli Fəaliyyət Planı” təsdiqlənib. 27 aprel 2016-cı il tarixdə Prezidentin müvafiq sərəncamı ilə isə növbəti, “Açıq hökumətin təşviqinə dair 2016-2018-ci illər üçün Milli Fəaliyyət Planı” təsdiqlənib. Plan 11 istiqamət üzrə qruplaşdırılmış 58 tədbiri əhatə edir. Həmin istiqamətlər üzrə nəzərdə tutulan tədbirlərin icrası istiqamətində işlər davam etdirir”.
Daha sonra “Açıq hökumətin təşviqinə dair 2016-2018-ci illər üçün Milli Fəaliyyət Planı” haqqında iştirakçılara məlumat verən Xalid Kazımov fəaliyyət planında görülməsi planlaşdırılan işlərlə bağlı sualları cavablandırıb.
Eyni zamanda iştirakçılara respublikamızda dövlət qurumlarının göstərdikləri elektron xidmətlər və onlardan istifadə ilə bağlı nəzəri və təcrübi məlumat verilib. Sonda elektron xidmətlərdən istifadə ilə bağlı iştirakçıları maraqlandıran suallar cavablandırılıb.
Qeyd edək ki, layihə çərçivəsində növbəti tədbirlər İsmayıllı, Qəbələ və Quba rayonlarında keçiriləcək.
