Xalq Cəbhəsi Partiyasının Ali Məclisinin Rəyasət Heyətinin üzvü Məmməd İbrahim cəzasının yarısını çəkməsi ilə əlaqədar vaxtından əvvəl şərti azadlığa buraxılması xahişi ilə məhkəməyə müraciət edib. Bu barədə Turan-a onun oğlu Turan İbrahim bildirib.

Onun sözlərinə görə, İbrahim ərizəsini cəzasını çəkdiyi 16 saylı cəzaçəkmə müəssisəsinin rəhbərliyinə verib. Ərizəyə dekabr ayı ərzində baxılacağı gözlənilir.

İbrahim 2015-ci il sentyabrın 30-da xuliqanlıq (221.1) ittihamı ilə həbs edilib, şikayəti keçmiş AXCP üzvü Mikayıl Quliyev verib. Sonradan bu maddə daha ağır ittihama – 221.2.2-ci (xuliqanlıq, silah kimi istifadə olunan alətdən istifadə ilə törədildikdə) maddəyə tövsif edilib.

Martın 15-də Nərimanov rayon məhkəməsi İbrahimi təqsirli bilib və 3 il müddətinə azadlıqdan məhrum edib.

İbrahim cəzasının 1/3-ni çəkməsi ilə əlaqədar artıq cəzasının yüngülləşdirilməsi və məntəqə tipli cəzaçəkmə müəssisəsinə köçürülməsi üçün məhkəməyə müraciət edib. Amma 2016-cı il noyabrın 25-də Suraxanı rayon məhkəməsi vəsatəti təmin etməyib.

Hüquq müdafiə təşkilatları İbrahimi siyasi məhbus kimi tanıyıb.