Mayın 22-də Repartyorların Azadlığı və Təhlükəsizliyi İnstitunun sədri Emin Hüseynovun təşəbbüsü ilə “Pandemiya dövründə Azərbaycan Vətəndaş Cəmiyyətin problemləri və onlardan çıxış yolları” mövzusunda zoom konfrans keçirilib. Konfransa 30 nəfərə qədər vətəndəş cəmiyyəti numayəndəsi qatılıb və 3 saatdan artıq bir müddətdə faydalı müzakirələr aparılıb.
Virtual konfransı açan Emin Hüseynov bildirib ki, vətəndaş cəmiyyəti institutları bütün dünyada COVID 19 pandemiyasının mənfi  təsirindən çox ağır duruma düşüb: “Azərbaycanda isə sivil toplumun durumu onsuzda 2013-cü  ilin sonundan bu günədək günü gündən pisləşməkdədir. Qeyri hökumət təşkilatları faktiki son 6 ildə ölkə ərazisində qanuni fəaliyyət göstərə bilmir və bunun əsas səbəbi 2013 cü ildə QHT-lərlə bağlı qanuna edilən əlavələr və dəyişikliklərdir”.
Konfransa qatılan vətəndaş cəmiyyəti üzvlərinin bir çox qeyd edib ki, hökümətin bu sahədə islahatlar vəd etməsinə baxmayaraq vəziyyət acınacaqlı olaraq qalır. Azərbaycanda pandemiya fonunda insan hüquq və azadlıqlarının əsassız məhdudlaşdırılması da olduqca yayğın bir mənzərəyə çevrilib. QHT-lərin dövlət qeydiyyatına alınması və qeydiyyatı olan QHT-lərin donorlardan aldığı qrantların müqavilələrinin qeydiyyata alınması hələ də Ədliyyə Nazirliyi tərəfindən qəsdən və qanuna zidd əsaslarla yubadılır.
Görüşdə həmçinin vurğulanıb ki, Avropa İnsan Hüquqları Məhkəməsi Azərbaycan hökümətinin birləşmə azadlığının pozulması faktlarını öz qərarlarında dəfələrlə təsvir etsə də, hökumət bir çox hallarda QHT-lərin qeydə alınması ilə bağlı pozuntuları aradan qaldırılması istiqamətində qərarları icra etmir.
Çıxış edənlər bildiriblər ki, bu günə kimi Azərbaycan Respublikasının Baş Prokurorluğunun Ağır cinayətlərə dair işlər üzrə istintaq idarəsinin tərəfindən onlarla yerli və xarici QHT-lərə qarşı başlanmış cinayət işi qapadılmayıb, dondurulmuş bank hesabları açılmayıb, müsadirə edilmiş əmlaklar qaytarılmayıb. Halbuki bir çox yerli və beynəlxalq hüquq müdafiə təşkilatları bu cinayət işini əsasəz və sifarişli hesab edir.
“QHT-lərə qarşı qaldırılmış cinayət işinin əsassız olduğunu ötən günlərdə Ali Məhkəmənin Plenumu tərəfindın İnsan Hüquqları Klubunun sədri Rəsul Cəfərov haqqında çıxarılmış qərar da sübut edir”- deyə Emin Hüseynov bildirib: “Rəsul Cəfərova qanunsuz sahibkarlıq, vergidən yayınma və vəzifə səlahiyyətlərini aşmaqla bağlı ittihamlar əsassız hesab edilib və onun məhkumluğu tam aradan qaldırılıb, Ali Məhkəmənin Plenumu onun barəsində tam bəraət qərarı verib. Məhz bu qərara əsasən Azərbaycan höküməti QHT-lərə qarşı başladığı biabırçı təqib müharibəsinə son qoymalıdır”.
Həmçinin Azərbaycan hökümətinin QHT-lərin fəaliyyətinin yaxşılaşdırılması istiqamətində atacağı addımlar barədə danışan Konstitusiya Araşdırmaları Fondunun rəhbəri Əliməmməd Nuriyev hökümətin bu sahədə ciddi islahatlar nəzərdə tutduğunu və vəziyyətin daha da yaxşı istiqamətdə dəyişəcəyini deyib.
Həmçinin müzakirələrdə qeyd edilib ki, COVID 19  pandemiyası QHT-lərin donorlardan ala biləcək dəstəyi də xeyli məhdudlaşdırıb. Bununla bağlı yerli və beynəlxalq donorlara birlikdə yol xəritəsi hazırlamaq və donor koordinasiya müzakirələrini keçirməyin vacibliyi mövzusunda da müzakirə edilib.
İnternet müzakirələrə qatılanların bəziləri isə əsas diqqəti hələ də QHT və mətbuat nümayəndələrinə qarşı davam edən təqib hallarına yönəldiblər. Hüqüq müdafiəcisi və jurnalist Elçin Məmmədin saxlanılması, Tofiq Yaqublunun növbəti dəfə şərlənərək həbs edilməsi, sosial şəbəkə vasitəsi ilə hökümətdən uşaq pulu tələb edən Aqil Hümbətovun dəlixanaya salınması və sair çoxlu sayda digər neqativ hallar barədə dərin narahatlıq bildirilib.
Virtual dəyirmi masa Azərbaycanın aparıcı YouTube kanallarında canlı yayımlanıb və on minlərlə vətəndaş tərəfindən izlənilib.